Dat weer en groten runnen Geburtsdag in Soltau – de egentliche Dag weer de 15. Oktober, de Fier weer an’n 18. Oktober. Inlaadt harr de Freudenthal-Gesellschap, bi de Kröger vele Johren lang Vörsitter ween is. Denn weren dor de Karken-Lüüd – 60 Johr lang hett Hein Kröger sik för Platt in de Kark insett. Un denn weren de Plattdüütschen dor: de Plattdüütsch-Beopdragte vun den Heide-Kreis un een vun dat Institut för de nedderdüütsche Spraak, bi dat he in den Vörstand un den Biraat Platt stüttig mit anschaven hett.
Platt snackt he mit jeedeen. Un so is he allerbest dör’t Leven kamen. Nu is de Mann 90 – un kregel as man wat. Wi wünscht Freid, Frünnen un Familie, Ideen un Gesundheit.