Endlich dor: Eilander

Goot 40 Johr hebbt wi nu op Gerd Spiekermann siene Gedichten luert. In Bevensen harr he Stücken dorvun an’t Enn vun den 70er Johren vörleest. Opdeelt is dat Book nu in de Tiet-Stremels 1976-1990 un 1995-2021. Woneem staht wi? Wat sleept wi ut de olen Tieden mit uns rüm? Woneem wüllt wi hen?

Siet 40 Johr kennt wi Gerd Spiekermann as Verteller, de mit Plie sien Publikum ünnerholen kann. Un nu en ganz anner Siet: He versteiht dat allerbest, Stimmung un Spannung infangen un lyrisch op’n Punkt bringen – wat dat nu üm dat Kind geiht, dat vör Bangween nich in’n Slaap finnen kann, oder üm dat, wat Levensstil heet. Dat sik dor so’n Barg an poetische Energie opladen deit, kummt wiss ok dorvun, dat Spiekermann de Spraak to sien Speeltüüch maakt. Un allens is Metapher: de wind weiht ut kene richt ut jede richt.

So lang op den Eilander to töven – dat hett sik lohnt.

Gerd Spiekermann: Eilander. Gedichten. Quickborn-Verlag : Hamburg 2022, 54 S.

ISBN 978-3-87651-491-8