Gunnelt, Guschi un de annern

En Kinnerbook mit allerfeinste Biller to’n Ankieken un en Geschicht, de wunnerbor vertellt is. Guschi is en Gördeltier un Gunnelt en Ameisenboor. De beiden leevt tohoop in en Wahngemeenschop. Man een Dag warrt dat Gunnelt allens to veel mit de Opgaven un de Arbeit un de Frünnen in den groten Wald.

Dat Book hett meist DIN-A-4-Format. So is op de Biller jümmers noog to kennen. Links op en Dubbelsiet is de plattdüütsche, rechts de hoochdüütsche Text afdruckt. Wenn een dat verglieken deit, warrt een wies: Op Platt löppt mennigeen Satz heel un deel anners. Un jüst so mütt dat ok ween!

Un an’t Enn kann een sik ok noch över en QR-Code dat Leed vun den Regen in’n Kopp anhören. Un natüürlich ok mitsingen.

Ove Thomsen: Regen in’n Kopp. Regen om Kopf. Illustriert von Melf Petersen. JUMBO Neue Medien : Hamburg 2023, 40 S.

ISBN: 978-3-8337-4615-4