He höör to de to, de 1972 dat INS grünnt hebbt un he weer vun 1989-2004 de tweete Vörsitter vun den Vörstand.
Dr. Heinrich Kröger, 1932 op de Welt kamen in Ahrenswohlde bi Stade un siet 1959 Paster in Soltau, hett för sien Preesteramt un för de plattdüütsche Spraak liekerwies leevt un düsse beiden Saaken good tohoopfögt: As Pioneer vun de Plattform „Plattdüütsch in de Kark“ hett he bannig veel dorto bidragen, dat de norddüütsche Regionalspraak wedder en Platz op de Kanzeln, vör de Altaren un in de Radiosendungen vun de Kark kregen hett. Aver ok buten de Karkenmuuern hett Heinrich Kröger dat Plattdüütsche, dat he sülvens snackt hett, wennjümmer dat güng, an veele Stellen Stütt geven: He weer Vörsitter vun de Freudenthal-Sellschopp, hett pattdüütsche Literatur-Veranstalten organiseert, seet in de Jurys vun plattdüütsche Literatur-Priesen, hett dat Forum Plattdüütsch in‘n Heidekreis in’t Leven ropen un en Barg Opsätz un Bööker to de plattdüütsche Spraak und Literatur schreven un rutgeven.
„Hein Kröger hett nich blots platt snackt un preestert, he hett in de Spraak leevt un sik för ehr insett. He weer en ganz starken Pieler för dat INS, dat em dull an’t Hart leeg, un he weer en Minsch mit en warm Hart, de annere begeistern kunn. He ward us fehlen“, seggt Herwig Dust vun den INS-Vörstand. Wat Hein Kröger in den lesten Afschnitt vun sien Leven ok an’t Hart leeg, weer, dat dat een etymologisch Wöörbook geven schall, wo man de Wuddeln vun de plattdüütschen Wöör nakieken kann, so as’t dat för dat Hochdüütsche al lang givt. He hett sik dor över veele Johren för engageert un kunn noch beleven, dat de Saat vun sien Insatz opgüng: Dat Wöörbook-Projekt hett losleggt un is op’n gooden Padd.
An’n Sünndag, 25. Mai, is Hein Kröger tohuus in Soltau in Freden inslapen. Siene Familie weer bi em. He würr 92 Johr oolt.
Text: Dr. Wolfgang Krischke / Foto: privat