Proten lehren

Plattdüütsche Lehrböker för Schoolkinner sünd in de verleden Johren hier un dor rutkamen. Nu also in teihn Lexen in oostfreesch Platt. De Themen sünd anlehnt an dat, wat begäng is: Begröten un Tellen, In de School, Freeitied un Klören, Famielje un Tahlen bit Hunnert, Eten un Drinken, Deren, Mien Liev, Dagen un Uhrtieden, To Huus, Beropen.

Ut de Schoolpraxis rut hebbt Wilfried Zilz un Remmer Kruse Leder, Comics, Spelen, Radels, Biller un Verkloorstücken to en Lehrgang tohoopstellt, de en Barg Klöör in den Ünnerricht för Spraak-Anfängers bringt. Babvenan steiht dat Snacken, man dat een dorför Wöör bruukt, wiest sik an de Listen, de jümmers wedder dat afsekert, wat dor in de Saak verhannelt worrn is.

Vun dat Platt her is dat Lehrbook blots in Oostfreesland to bruken. Man as Vörbild kann dat överall gellen.

Remmer Kruse und Wilfried Zilz: Moin! Dat Plattbook. Hrsg. vom Verein Platt und Friesisch in der Schule e. V. Quickborn-Verlag : Hamburg 2023, 96 S.

ISBN: 978-3-87651-494-9