Mit veel Platt dör Mäkelborg un Vörpommern

„Stier und Greif“ is jüst mit dat eerste Heft vun den Johrgang 2022 rutkamen. Minschen un Begevenheiten ut ole un ne’e Tieden wiest op Mäkelborg-Vörpommern as en lebennig Stück Land mit afsünnerlich vele Klören.

Plattdüütsche Vertellen loopt hier in en extra Deel: Geschichten un Gedichten, tomeist ut verleden Tieden. Blots bi een vun de Schrieverslüüd kann een en beten vun de Levensgeschicht nalesen – bi de annern harr dat ok nich verkehrt ween. An twee Steden is wat vun den Roman „Hein Hannemann“ to lesen, de vun Hooch na Platt översett worrn is: Eenmal vun de Idee un woans dat lopen is (S. 56), un denn is en Stück ut dat eerste Kapitel afdruckt (S. 44-45).

Un – klooor doch – Fritz Reuter steiht över allens. Hier mit en lütten Bericht över “Reuter-Geld” ut de Johren 1921/22 un en “Reuter-Sparziergang” in Stemhagen. Man dat gifft ok wat över „Platt inne Kark” to lesen.

Stier und Greif. Heimathefte für Mecklenburg-Vorpommern. Jahrgang 2022, Heft 1. Hrsg. vom Heimatverband Mecklenburg-Vorpommern. Hinstorff Verlag : Rostock 2022, 94 S.

ISBN 978-3-356-02400-5