Kinnerwelten

As wenn dat nix anners geven dee, so vertellt Hans Wilkens vun Kinnerwelten: Wat is en Fründ, woso wüllt anner Kinner mi nich mithebben? För wat is dat vele Fragen goot? Un denn all de Spelereen mit Spraak: Dor weer eenmal en Hahn, seet baven op’n Kraan.

Dat is jüst de Oort vun Leesstücken, de hoochnödig för den plattdüütschen School-Ünnerricht bruukt warrt. Hans Wilkens is sülvst Schoolmester ween, un he hett en ganze Reeg Lees- un Speelstücken för Kinner schreven. Nu is he över 80, man he wiest mit siene Texte, wo jung he doch bleven is.

Wunnern kann een sik, woso en Kunstverlag (Galerie Lüth in Schobüll in Noordfreesland) düt Book rutgifft. Eendoont – bi Biller, Gestaltung un Satz sett dat en Mark för all, de Kinnerböker maken wüllt.

Hans Wilkens: Ik heff tohuus en Swien. Vertellen op Platt för Lütt un Groot. pictus verlag : Schobüll 2022, 73 S.

ISBN 978-3-949674-03-7