Dat blifft

In de verleden 50 Johr hett Helmut Debus en Bült plattdüütsche Leder schreven. Düt is nu sien 21. Studio-Album. Un wat för een! Dat is mehr meditativen Blues, mehr Snacken as Singen. Düüstere Geföhlen in Akkorden, de vör sik hendrüppelt, hier un dor en Anklang an’t Shanty. Luustern op dat, wat twüschen de Töön liggt. Un twüschen de Wöör. Intim, ganz dicht bi.

Dat is mit dat beste, wat de plattdüütsche Lyrik opstunns anbeden kann – maandenweg vun den plattdüütschen Mainstream. Deepdenkern Symbol-Welten, veel Seefohrt mit Haven, Lengen un Kutter, mit Möwen, Dood un Matrosendrööm. Dor passt allens tohoop: De griese Heven weent.

Dat dat kloor is: Hier singt nich Leonard Cohen op Platt – nee, dat is Helmut Debus! De CD hett den Pries vun de Düütsche Schallplattenkritik kregen. Un dat mit Recht. Geld för de CD hett för den Bund “Neustart Kultur” tostüert. Düt Geld is allerbest anleggt.

Helmut Debus: Angst legg di slapen. Fuego 2022.

4-006180-339622. LC 08823