All singt mit – mal hooch, mal platt
En Spraak leevt in de Leder, de de Kinner singt. 88 Kinnerleder un Riemels sünd op düsse Dubbel-CD to hören. 49 för de Lütten (vun “Alle meine Entchen” bet hen na dat “Braatketüfelleed” un “Dat du mien Leewsten büst”) un 39 för de Groten (mit “Tüdelband”, “Blaukraut” un “Oewer de stillen Straten”). Platt un Hooch staht blangen ‘nanner. To’n Nalesen sünd all de Ledertexten in en Booklet afdruckt.
Rutgeven hett de CD de Heimatverband MV. Bi’t Singen hebbt ganz vele Sängers un Gruppen mitmaakt. So höört sik dat jümmers wedder en beten anners an. Wenn een sik wat wünschen schull? – Leder mit Strophen op Hooch un op Platt. Un villicht ok noch in anner Spraken.
Wat ja dat Gode is: Wenn een de CD tohoop mit Kinner anhöört, denn duert dat nich lang un all bölkt se mit. Wat ‘n Spaaß!
Sing mit uns im Norden alte und neue Kinderlieder und Reime in Hoch und auf Platt. Hrsg. v. Heimatverband Mecklenburg-Vorpommern e. V. Schwerin : Tennemann 2020.
LVC-Records / LVC 3011192
