Drift

Woneem staht wi mit dat Plattdüütsche? Woneem wüllt wi hen? Un: Wat drifft uns an? Dat sünd Fragen, bi de vele Plattsnackers in’t Gruveln kaamt. Un hier is nu de Broschüür, de all de Moot maken will, de sik för Plattdüütsch insetten doot: “Wi sünd dor, wo de plattdüütsche Spraak uns bruken deit”.

De Vereen Plattdüütsch Zentrum in den Landsdeel Sleswig e.V. hett dat Heft rutgeven – goot antokieken, allerbest to lesen. In Platt un in Hooch – un jeedeen kann sehn, dat de plattdüütsche Text ganz anners lopen deit as de hoochdüütsche. Dat geiht üm Identität, Platt mehr noch buten wiesen, Platt sülvstverständlich as Deel vun de Kultur begriepen, mit Platt de Kinner för mehr Spraken opsluten, ok online, ok op’t Handy, un jümmers ok: Mit anner Lüüd tohoop wat op de Been stellen.

Un denn liggt dor ok noch en “Formulor to’n Bitreden” mit bi – wat will de Minsch mehr?!

Drift för Plattdüütsch. platt.best. Zentrum für Niederdeutsch. Landsdeel Sleswig. post@platt.best. Leck 2023.