Oostoostfäälsche Wöör

Oostoostfäälsch – dat is dat Platt, wat in de Gegend rund üm Maideborg snackt warrt. Vörweg maakt de Autor kloor, dat faken twee Formen oder mehr begäng sünd. Denn verkloort he en Handvull grammatische Grundregeln un wiest achteran de plattdüütschen Oortsnamen in den olen Kreis Wolmirstedt. Den gröttsten Deel maakt de Wöörlisten ut: vun ää bet Zwikkmelle. Vun Platt na Hooch – un denn vun Hooch na Platt.

Acht Johr lang hett Karl Ulrich de Wöör för siene Sammlung tohoopdragen. Wat dorbi rutkamen is, dat wiest: Düsse Schrieversmann hett grote Freid an den Klang un de Utdruckswiesen in Platt. Wo riek de Listen sünd, kann een an de velen, velen präfigeerten Verben sehn, twüschen opbammeln un opwiesen.

Düsse Oort vun Tosamenstellen an Wöör un Grammatik kann een jeedeen Gegend blots wünschen.

Karl Ulrich: Plattdeutsches Wörterbuch. Die Mundart rundum Magdeburg. Ostostfälisch – Hochdeutsch. Hochdeutsch – Ostostfälisch. Magdeburg 2021, 352 S.

ISBN 978-3-935831-80-2