Rostocker Jung mit Hund

De hoochdüütsche Original-Roman is vör akraat hunnert Johr rutkamen, tomals harr sik de Schrieversch Sophie Kloerss dat Pseudonym W. v. d. Mühle toleggt. Nu steiht de richtige Naam op dat Book op, dat Vertellen is allerbest op Platt översett un nimmt uns mit in de Tiet twüschen 1898 un 1910. Un wat se dor in Rostock un in’t Ümland allens beleevt hebbt – Hein Hannemann un sien Hund Rüpel!

Bi’t Översetten hebbt mehr as 20 Lüüd mitmaakt. Liekers leest sik dat vun vörn bet achtern as een Stück – wat blots wiest, dat en gode Redakschoon jeedeen Book wiederhelpen deit. Kloor hett dat den een oder annern griese Hoor maakt. Kloor is aver ok: Düt Book is en Gewinn.

Opschreven is de Jungsgeschicht in de Mekelnborger Schrievwies na Renate Herrmann-Winter. So is dat Book ok in de Scholen twüschen Dassow un Anklam goot to bruken.

Sophie Kloerss: Hein Hannemann. Läuschen von de Waterkant. Lexikus Verlag : Bad Kleinen 2021. 286 S.

ISBN 978-3-940206-59-6