Snack Platt mit Plattsnack!

Op spelerische Oort Plattdüütsch lehren – woans dat geiht, wiest de beiden Heften, de düt Johr in frische Oplagen för de Grundschoolklassen 1/2 un vun 3 op an rutkamen sünd: (an)malen, en beten wat schrieven, en Speel spelen, en Leed singen, sik wat vertellen.

Nele Ohlsen hett de Arbeitsblääd in de verleden Johren in de Kirsten-Boie-Grundschool in Wallhöfen (dat liggt in’t Düvelsmoor) utklookt. In 14 Lexen geiht dat dör de Themenwelt vun de Kinner: Speeltüüch, Lief, Markt, Ünnerwegens, Geboortsdag – in Situatschonen mit de Spraak wat doon. Dat Lehrerhandbook kann een ünner www.schoolmester.de/plattsnack anstüern.

Dat Kultusministerium in Neddersassen hett vun beide Heften 8.000 Stück drucken un verdelen laten – un dat in 6 plattdüütsche Spraakvarianten. Nu kümmt dat dor op an, dat de Blääd so lang nadruckt warrt, as de Scholen jem bruukt. Un ok, dat noch mehr Blääd dortokaamt. De Warkböker wiest ok op den Weert, de Platt in de School tokümmt.

Plattsnack. Warkbook. Nordniedersächsisch. Arbeitsheft für den Niederdeutschunterricht an Grundschulen. Schuljahrgang 1/2, 3. überarb. Aufl. 2021, 64 S.

Plattsnack 2. Warkbook. Lehrwerk für den Niederdeutschunterricht an Grundschulen ab Klasse 3. 2. Aufl. 2021, 78 S.

Scroll to Top