Wöörbook Nummer 83

Vun dat Neddersassische Wöörbook is jüst dat 83. Heft rukamen. Dat löppt vun “Sprickelbeen” bet “Stell”. Kloor – dor staht veel mehr Wöör binnen, as en enkelten Minsch kennen kann. Düsse Wöör kaamt ut all Gegenden vun Neddersassen. Alleen de Artikel “stahn” (hier: stan) löppt över 13 Spalten, mit 7 Bedüden.
Blangen “stantepe, standepe” finnt sik ok “stantebeens” un “stansfoot”. Un wat dor allens ünner “Stank-” un “Stänker-” versammelt is, wiest op all de Klören, de Platt utdrücken kann. Bi “Spring-” gifft dat en ganze Reeg Wöör för fröhliche oder hibbelige Lüüd: Spring-in-Bult, Spring-in-dat-Feld, Spring-in-de-Goot, Spring-up-den-Stenner.
So bilütten geiht dat Neddersassische Wöörbook nu op Z to. För de Platt-Arbeit in’t Land is dat Gold weert. Un dat is ok gor keen Fraag: Dat Wöörbook mutt bi Z ankamen.
Niedersächsisches Wörterbuch. Hrsg. von Albert Busch, Seminar für Deutsche Philologie der Universität Göttingen, AQrbeitsstelle Niedersächsisches Wörterbuch. 83. Lfg. (XI, 5). Sprickben – Stell. Bearbeiter: Eckhard Eggers. Neumünster : Wachholtz Verlag 2021, S. 513-640.

Scroll to Top