Stührwoldt bannig groot

Vertellen kann de Mann as man wat. Un dor bruukt he siene Tohörers för. Meist 20 Johr is he nu al in de plattdüütsche Welt ünnerwegens un vertellt vun sik as Buer, as Familienvadder mit fief Kinner un vun allens dat, wat de Alldag em so toweiht. Un nu: 29 frische Vertellen un worraftig 5 Gedichten.

Nee is Matthias Stührwoldt sien Lyrik. Kloor – dat is jümmers noch sien Welt op en Buernhoff. Man hier steiht nu de Tiet still. Een Idee, een Trüchdenken, een Funken – inbunnen in fre’e Verse, de sik sehn laten köönt. Un wenn he an de poetische Spraak noch en beten arbeiden wörr, denn kunn dat sogor richtig goot warrn.

Stührwoldt schrifft jüst so as he snacken deit, so haalt he sik dat een oder anner locker ut de hooochdüütsche Wöörkist un mehr noch ut den Satzbo röver in sien Platt. Man in anner Spraken gellt doch ok: Snacken is wat anners as Schrieven.

Matthias Stührwoldt: Groot un stark. Hamburg : Quickborn-Verlag 2021, 120 S.

ISBN: 978-3-87651-478-9

Scroll to Top