Tieden

Dat Leven hett vele Klören. Un dat för jeedeen ok wat dorbi is, dorüm sünd hier Geschichten vun glieks dree Schrieverslüüd afdruckt: Petra Wede is in de verleden 15 Johr veel mit Platt ünnerwegens ween; en beten wat länger is Bernhard Koch dorbi, he hett ok veel Radio maakt; Hans-Hinrich Kahrs hett al in de 80er Johren anfungen mit Höörspele, Theaterstücken un Sketche, en Barg dorvun ok för de School.

All schrievt se vun’t Leven un vun uns Tiet. – Petra Wede mit den Blick för Urlaub, kole Fööt un Geschenke, de wi gor nich hebben wüllt. Se vertellt frisch un bringt de Saken op’n Punkt. – Bernhard Koch speelt mehr mit dat Wünschen un Sik-Vörstellen, to’n Bispeel to Wiehnachten. Un wat dor denn allens löppt oder jüst nich löppt; un wat dor ok mal en Afgrund luert. – Hans-Hinrich Kahrs kickt genauer hen bi dat, wat Naverschaft utmaken deit, un as Schoolmester hett he en Sinn för Kinner, de to Huus faken ganz anner Saken to regeln hebbt as in de School.

Twüschen de Stücken vun de enkelten Schrieverslüüd steiht jümmers en korten Dialog, de wiest, dat dat Staffelholt nu övergeven warrt. Dat is en lütte feine Idee.

Petra Wede, Bernhard Koch, Hans-Hinrich Kahrs: Söte Tieden, sure Tieden. Plattdüütsche Geschichten. Quickborn-Verlag : Hamburg 2023, 127 S.

ISBN: 978-3-87651-502-1