Utgraven un en beten Platt
12 Johr lang – vun 2008 bet 2020 – weer Rolf Bärenfänger Direkter vun de Oostfreesche Landschap. Dorför un dat he goot in sien Rententiet rinkümmt, hett de Oostfreesche Landschap en staatsche Festschrift rutgeven, mit en Barg Biller un in’t grote Format: “Ostfriesland – Niedersachsenweit”. In sien Forscherleven weer un is de Mann Archäologe – kloor, dat sik dor en ganze Reeg vun Artikel üm dreiht.
Nu hett bi de Oostfreesche Landschap de Arbeit för de plattdüütsche Spraak in de verleden Johrteihnten en grote Rull speelt. In den allerletzten Bidrag schrifft Grietje Kammler, se hett dat Leit vun dat Plattdüütsk Büro, över „Vorteile statt Vorurteile. Die Chance ‘Mehrsprachigkeit’. Ostfriesland und das Saterland als Modellregion für frühe Mehrsprachigkeit“. Dor geiht dat üm de Idee un den Afloop vun en Projekt, dat twüschen 2012 un 2019 lopen is. Nu kann een vun mehr Spraken un Immersion lang un breet hen un her snacken. Wat aver ok rutkümmt, dat is: Wenn Platt en Tokunft hebben schall, denn sünd Ideen vun Belang, en wetenschaftliche Grundutrichtung höört dorto, en gode Öffentlichkeitsarbeit un vele Lüüd un Gruppen, de pö a pö dör en dick Brett dörbohrt.
Kloor – dat lohnt ok, annern vun de 28 archäologischen Bidrääg un 11 Opsätz vun güstern un vundaag to lesen.
Jan F. Kegler (Hrsg.): Ostfriesland – Niedersachsenweit. Festschrift für Rolf Bärenfänger. Ostfriesische Landschaft : Aurich 2020, 372 S.
ISBN 978-3-940601-62-9
