Vun em un ehr

Gifft ja so’n Lüüd, de to allens, wat se so beleven doot, en egen Geschicht vertellen köönt. Un dat deit Jutta Lammèr mit vulle Kraft. 60 Vertellen hett se in düt Book versammelt, all leest se sik, as wenn di en gode Fründin wat vertellen deit: Vun ole Lüüd un junge Lüüd, vun fröher un vun nu, vun Utverkoop, Grootreinmaken un Handwarkslüüd. Jümmers frisch vun de Tung, un an’t Enn ok noch mit en Dreih.

Vun de Schrieversch kriegt wi meist nix to lesen. Op den Achterdeckel vun dat Book steiht op: “Jutta Lammèr weer Journalistin un Publizistin ut Hamborg”. In’t Internett kann een dat een oder anner vun de Fro finnen – man woans kümmt so’n Fro to dat Schrieven op Platt? Harr nich schaadt, wenn Jutta Lammèr ok vun sik sülvst vertellt harr.

Op den Deckel steiht ok op, de Geschichten weren “in modernes Platt” schreven. De Schrievwies is en beten anners as dat, wat een so kennen deit. Man wenn “modern” nu heten deit: Dor is en Barg Hoochdüütsch mit rinmengeleert, denn schullen wi as Lesers dor eerstmal över nadenken.

Jutta Lammèr: Oogenblick mol … Grienen – Schüttkoppen – Sinneeren. o.O. : Marless Verlag 2021, 220 S.

ISBN: 978-3-9819019-6-2