För de Klassen 5 bet 9/10

En Spraak-Lehrbook för de Schoolklassen 5 bet 9 (oder 10) – dat hett bet nu för Plattdüütsch fehlt. In teihn Lexen geiht dat üm School, Eten un Drinken oder Freetiet. Dat Snacken steiht bavenan, man dor höört denn ok jümmers en Woortfeld mit to un ok en Happen Grammatik.

Vele ünnerscheedliche Opgaven maakt dat Sprakenlehren eenfacher. Un se bringt Klöör in dat Book. Nich kloor is, wat de Schölers ut de Grundschool mitbringt. Nadenken schullen de Tostännigen över Wöör ut dat moderne Leven: Wat seggt wi to Haltestelle, Schaffner, Schiene, Ampel? Steiht de Doorwart worraftig an’n Posten? Un schall dat „Handy“ nu Plietschfon heten un de „Kfz-Mechaniker“ Wagenklempner?

För de Grafik hett Hagen Schulze sorgt – dor gifft dat en Barg op de DIN-A-4-Sieden to bekieken un to söken. De Schrift is an vele Steden en beten lütt – man so geiht eben ok mehr op so’n Siet rop.

Heike Hiestermann un Katrin Konen: Snacken. Proten. Kören. Plattdüütsch-Lehrbook för de Sek I. Hamburg : Quickborn-Verlag 2021, 144 S. 

ISBN: 978-3-87651-477-2