Brannenborg – Vörbild för Noorddüütschland
Dat Bunndland Brannenborg wiest mit düt Heft, wat de Staat allens dorför in Gang setten kann, dat Platt beter in’t öffentliche Leven to sehn is. Dat geiht üm Stratennamen, Ortsschiller, Inschriften un Henwiesen. Platt steiht hier ganz normal blangen dat Hoochdüütsche. Un dat is en Togewinn för all Sieden.
Den groten praktischen Weert vun dat Heft maakt Kapitel 10 ut. Afdruckt is en List mit mehr as 1250 Ortsnamen in dat amtliche Hoochdüütsch un op Platt. Överall dor köönt de Verwaltungen nu bigahn un seggen: Ja, wi bruukt för uns Gemeend oder uns Dörp en Schild op Platt.
Wat so anners is: De Staat töövt hier nich af un luert op dat, wat de Lüüd verlangt. De Staat sülvst is dat, de seggt: Twee Spraken – dat is goot. Dat höört to uns Land mit to, un dat wüllt wi wiesen. Un dorüm stweiht dor ok: “Een Läben oahn Plattdütsch is moeglich, awer sinnlos.”
Land Brandenburg. Ministerium für Wissenschaft, Forschung und Kultur: Plattdüütsch sichtboar moaken. Niederdeutsch sichtbar machen. Redaktion: Referat 14 des MWFK, Meto Nowak. [2023], 68 S.
poststelle@mwfk.brandenburg.de
