Mit Hardrock un Punk

Dat Mönsterland wiest sik hier vun en Siet, vun de wi faken nich veel künnig warrt. Udo Lindenberg un Axel Prahl as Muster för “de besten Dickköppe up de ganze Welt”. Dat Ruhrgebiet dicht bi, de Alldag ännert sik vun Dag to Dag. Dor Kurs to hollen un op dat to kieken, wat in en Minschen binnenstickt – un nich op sien Hoor oder Kledaasch – dor wiest de Schrieversch mit den Finger op.

Dat is al dat veerte Book vun Annette Katharina Winkelhorst in’t westmönsterlännsche Sandplatt. Se vertellt meisttiets vun dat, wat se sülvst beleevt hett. Blots af un an sickert dor mal en Droombild mit dör. De een oder anner Afsatz harr bi’t Lesen helpen kunnt. Veermal kümmt de Schrieversch mit Riemelkunst vör Dag, twüschen “Koh-Rap” un “Up Wacken”.

Endlich seggt dat mal een: To dat “Fröher” in’t plattdüütsche Land höört nich blots de Buernhoff un Oma un Opa – nee, dor höört ok de Disko un de Rotten vun de Punkers mit to.

Annette Katharina Winkelhorst: Puppkrutt. Pogo. Punkerstewwel. Döhnekes öwwe Subkultur un andere Widerstände in usse Mönsterland. agenda Verlag : Münster 2021, 170 S.

ISBN 978-3-89688-713-9