Wat för en Book!
Sowat 90 Lüüd hebbt hier opschreven oder to Protokoll geven, wat Platt för en Rull in jümehr Leven speelt. Heel un deel ünnerscheedliche Lüüd, de all in dat Mönsterland un dat Ossenbrügger Land un de Gegenden dichtbi to Huus sünd. Kloke Wöör, nadenkern Wöör. Berichten ut en Tiet, as Platt noch “normal” weer. Mank de velen Sichtwiesen sünd ok Stimmen vun junge Lüüd. Op en Familienfier seggt de lütte Olli op mal: „Opa spricht so komisch. Ich kann Opa gar nicht verstehn. Ich glaube, Opa ist ein Ausländer.“ Kiek, un dat hett wat bi Rudolf Averbeck in Gang sett. Un so hett he över Johren en Lehrbook entwickelt.
Tosamen sünd dat de Leesstücken un de Biller, de dat dat Book to en Prachtbook maakt. Un de noch mehr sehn un vör allen ok hören will, kann en ganze Reeg QR-Codes anknipsen – so kümmt de plattdüütsche Spraak bi’t Lesen an’t Ohr.
En Book mit Minschen un Kultur, mit Alldag, Berufsleven, Familie un Frünnen, mit Politik un Wetenschaft. En Book, dat Moot maakt för de plattdüütsche Spraak. Un dat jüst in en Gegend, in de Platt nich veel to hören is.
Helmut Lensing, Bernd Robben, Christof Spannhoff (Hrsg.): Wat, de kann Platt? Selbstzeugnisse, Geschichten und Gedichte aus dem Münsterland und dem Osnabrücker Land. Verlag der Studiengesellschaft für Emsländische Regionalgeschichte : Meppen 2021. 375 S. – Bezug: kontakt@emslandgeschichte.de
ISBN 978-3-9821831-4-5
