Düvelsfro – Düvelskeerl

Wedder hett Rainer Kramer en Stück Weltliteratur op Platt översett un rutgeven. Dütmal is dat Raymond Radiguet sien Roman “Le Diable au Corps”, de nu as “Satan in ’t Lief” vör Dag kümmt. De junge Mann is sowat 15 Johr, as he sien Leevde spöört to Marthe, verheiraat mit en Mann, de in den 1. Krieg in’t Feld steiht. Un dor is se, de unbannige Kraft vun Leevde, as blots junge Minschen ehr beleven köönt: Wat scheert mi de Moral?

Mit sien oostfäälsch Platt kümmt Rainer Kramer ran an den frischen un doch stillen Vertell-Toon vun vör 100 Johr. Tomals hett de Roman en Schandaal utlööst, 1923. Dat weer dat sülvige Johr, as de Schriever dootbleven ist. Mit blots 20 Johr.

Söss grote Vertellstücken hett Rainer Kramer nu al trecht: översett ut dat Engelsche, Franzöösche un Italiensche. Un wenn he noog Geld insammelt hett, denn köönt ok noch acht anner Böker druckt warrn.

Raymond Radiguet: Satan in ‘t Lief. Nee-Nedderdüütsch von Rainer Kramer. Berlin 2023, 223 S.

ISBN: 978-3-9824843-0-3