Thomas Naedler, Schwerin

Fackeln un Forken 

As Revolutschon wier in´t Dörp, sünd Lü so bös west, dat sei gor nich markt hebben, dat Fackel und Fork, för de sei bi Korl in’t „Wi hålen uns dat Dörp trüch“-Set grad 124,99 Euro betåhlt hebben, dat Fackel un Fork in´n Bumarkt nich mål 20 Euro kosten.

Ulrike Stern, Schwerin

Föfftig Johren forschen 

hanneln frågen sammeln instandhollen läsen sinnieren Klinkenputzen schriewen buddeln strieden wöltern rechtfardigen nådenken vördenken œwersetten verhanneln betåhlen nettwarken standhollen antwuurten bewohren œwerdrågen vöranbringen verbinnen verkloren vördrågen vermiddeln œwerwinnen utbaldowern rackern upnähmen formen fiern utklamüstern ünnerhollen ümkieken stüern klorkriegen inwarwen vörutgåhn beindrucken tausåmendrågen inståhn dörchhollen estimieren 

Nich weggtaudenken 

Bolko Bullerdiek, Hamburg

Foftig Wöör

Foftig Wöör,
för jeed Johr een
Fofftig Wöör,
mehr schüllt nich ween
Wünsch jo Knööv
un wünsch jo Moot,
denn warrt woll de Tokunft goot;
wünsch jo sünnerlich den Freden,
ohn den köönt ji nich goot leven,
Freden in joon lütt Schnoor-Huus
un ok buten, sünst warrt kruus,
wünsch jo Glück

Rainer Koch, Bobzin bei Hagenow

Relativität 

Dat gifft wenig Saken in disse Welt, up de man sik verlaten kann. De Dod hört up jeden Fall dortau. Manch ein Prepper wür alltaugiern weiten, wann dat sowiet is.  

Bäter wür dat sien, man weit, wo hei taulangen ward. Worüm? Na, dorhen bruukst denn ja gor nich ierst gahn

Johanna Kastendiek, Uetersen

Liekedeler 

De Klabautermann sitt op  de blootrode Fahn an’t Mast un dat Meerwief swimmt in’t Kielwater. 
Ünner Deck leven de Rotten un danzen mit den Düvel den letzten Reigen. 
Kumm, laat uns de Beker utdrinken bet op den Grund. 
Wi wöllt drunken starven. 
Nix blifft vun Klaus Störtebeker un Gödecke Michel.  
 

Heiko Thomsen, Hamburg

Platt schall leven 

Platt is uns Land un Platt is ok uns Spraak.
Lang stünn dat slecht; uns Spraak, de weer an’t Darven.
An’t Enn sünd wi noch lang nich mit de Saak:  
To laat is’t nich! Uns Plattdüütsch dörv nich starven.  
To laat is’t nich! Uns Plattdüütsch, dat schall leven. – Dreemal hooch!

Susanne Bliemel, Banzkow bei Schwerin

Morgen 

In de Wisch find ik ein Ei. Wat för’n Vågel hett dat lecht? Is dor wat binnen? Ik nähm dat in miene warmen Hännen, in miene Jack. Ward dat ’n Küken, ’n Draken? Is dat’n Windei? Wat ward ut mi? Warm hollen, ok, wenn’n nich weit, wat de Taukunft bringt. 

50 Jahr
Utkunft geven
un Raat an‘t Telefon
per Post un E-Mail Vördrääg
op Dagfahrten hooln un Gesicht wiest
Böker sammelt Stimmen un Musik Narichten
maakt Lehrwarken rutgeven Umfragen anstött
un de Charta Schnoor 41-46 in Bremen
eerste Adress för uns Spraak
un Kultur graleer
ok op nochmal
50 Jahr

Rainer Prüß, Flensburg

För de INSten 

Schriewen schall ‘k blots 50 Wöör,
man son Dank bringt wenig Klöör       
in dat Wark vun 50 Johren 
wo dat wussen is in‘ Goorn                    
wiel de Goorners vun de Spraak 
jümmers keken hebbt un waakt           
wat de Plant in Wind sik böögt  
Water hett – un ni verdrögt!