Bibliothekskatalog Google Books Plattdüütsche Landkoort INS-Lex Literatur- und Kulturpreise Neuerscheinungen News NeuerscheinungenVörsingen un mitsingen17. Mai 2022Teihn ole un ne’e plattdüütsche Leder sünd op de CD mit den plietschen Naam „Platt Platte“ op. Los geiht dat mit „An de Eck steiht en Jung“, denn kickt „Lütt Matten“ üm de Eck, un de „Hamborger Veermaster“ seilt ok vörbi. Dor is denn aver vun de Knööv, de in so’n Shanty binnensitten deit, nich mehr veel vun na. De fief neen Stücken nehmt sik uns Leven un de plattdüütsche Spraak vör: Vun „Vigeliensch“ bet „Bregenklöterig“. Wiebke Colmorgen, se is veel mit Platt in Hamborg ünnerwegens, hett sik den Muskant un Arrangschöör Hardy Kayser mit an Boord haalt. Na “Plattkinner” (2018) is dat dat twete Album vun jüm. Beid sünd se in de Näägde vun de Oostsee in Schleswig-Holsteen opwussen, un vun dor bringt se ok jümehr Platt mit. Dat is nu al de In dat CD-Bookje sünd lütte Geschichten to de Ledertexte afdruckt. För’t Mit- oder Nasingen weren ok de Texten sülvst nich verkehrt ween. Wiebke Colmorgen un Hardy Kayser: Plattplatte. Alte und neue plattdeutsche Lieder. Grosse Freiheit : Hamburg 2021. LC 12227. GF004 4-015698-953039... Weiterlesen...Plüschmoors is wedder dor1. Mai 2022Nu flüggt un brummt se wedder, de lütte Hummel Pummel Plüschmoors – akkerat fief Johr hett dat duert, man nu is de twete Oplaag dor. De lütte Brummfleger besöcht all de Deerten in de Naverschap un maakt jem Moot – un dat mit de Wöör „Geiht nich gifft’t nich“. Dat is wat för Minschen vun 2 bet 102. Dirk Böhling maakt Musik, speelt Theater, föhrt Regie, is Radio-Moderator, Entertainer un noch en ganzen Barg mehr. He is in Hooch un Platt ünnerwegens. Düt Book is dat eerste plattdüütsche Kinnerbook vun em. De Mann is bet baven vull mit kloke un snaaksche Ideen, un för dat Kinnerbook hett Scarlett Minz de plietsch un in Klöör ümsett. Hier oder dor is mal de een oder anner Bookstaav över Boord gahn. Villicht kriegt wi de ja in de drüdde Oplaag to sehn. Dirk Böhling: Pummel Plüschmoors oder Geiht nich gifft’t nich. Eine kleine Hummel entdeckt die Welt. Bremer Tageszeitungen AG : Bremen 2022, 23 S. ISBN 978-3-938795-58-3... Weiterlesen...… vom Leben zum Tode zu bringen …14. April 2022De sik mit Fritz Reuter as Schrieversmann un as Minsch befaat hett, weet: De Mann studeer Jura in Jena, dor maak he mit bi en Burschenschaft, un dorför keem he vör’t Brett. He weer 25 Johr oolt, as he mit sowat 200 annern to’n Dood afordeelt worrn is. Uwe Bake druckt hier de Akten vun dat Kammergericht Berlin af: Protokolle ut de Johren 1833 un 1834 un denn dat Ordeel 1836. De Staat güng mit Gewalt gegen allens an, wat em revolutionär düch. Bi’t Lesen warrt een wies, wat för en Denken tomals den Staat un de Gesellschaft utmaken dee. Un dorüm sünd ok de goot 30 Sieden vörweg vun Belang, in de Uwe Bake den Perzess inordnen deit, gesellschaftlich un juristisch. Düsse Dokumentatschoon is nich blots wat för Historikers. Nee, de sik mit de Literatur in dat 19. Johrhunnert ut’neensetten oder de Reuter in sien Schrieven verstahn will, schull düsse Tüügnisse nipp un nau dörarbeiden. Uwe Bake: Vorauseilender Gehorsam oder die unbegrenzte Auslegung. Der Hochverratsprozess gegen Fritz Reuter vor dem Kammergericht Berlin. Hrsg. v. Fritz-Reuter-Literaturmuseum : Stavenhagen 2022, 232 S. ISBN 978-3-910030-20-3... Weiterlesen...Jümmers wat to fiern8. April 2022Geboortsdag, Hochtiet, Truerfier – dat gifft so vele Gelegenheiten, bi de wi nich glieks des richtigen Wöör praat hebbt. Un wenn een sülvst ok nich de passlichen Wöör infallt, denn schüllt de Gedichten un Geschichten ut düt lütt Book wiederhölpen. Marianne Ehlers hett de Stücken thematisch tohoopstellt. De Texten sünd vun Groth, Storm, Fehrs, Bull, Lornsen, Spiekermann; denn sünd översette Stücken dorbi vun Schweitzer, Roth, Tolstoi, Brentano, Hebbel un annern mehr. Goot is: Dat Book is so lütt, mit 10 x 15,4 cm passt dat in jeedeen Jackentasch rin. Marianne Ehlers (Hrsg.): Laat uns fiern. Plattdüütsche Texten to’n Vördregen, Vörlesen in Opschrieven. Torechtmaakt un rutgeven vun Marianne Ehlers. Quickborn-Verlag : Hamburg 2021, 103 S. ISBN 978-3-87651-481-9... Weiterlesen...Platt-Mosaik18. März 2022De plattdüütsche Spraak hett vele Sieden. Un de plattdüütsche Kultur ok. In 48 lütte Happen verkloort Reinhard Goltz Markwöör twüschen Altsächsisch und Zweisprachigkeit: Grammatik, Spraakgeschicht, Namen, Leder, Theater, Literatur. Un wenn all de lütten Stücken tohoopkaamt, gifft dat en Indruck vun dat, wat allens to de plattdüütsche Spraakkultur tohören deit. Gifft ja jümmers noch Minschen, de seggt, Platt is en groot Geheemnis. För so’n Lüüd, man ok för all de annern, gifft dat hier wat to’n Kennenlehren, wat to’n Wunnern un ok wat to’n Smuustern: Hett Störtebeker egens Platt snackt, gifft dat en plattdüütsche Hymne un wat hett Platt mit Politik to kriegen? Dat wichtigst is woll: Dat is dat eerste Book över Platt, dat de Dudenverlag rutbröcht hett. Reinhard Goltz: Plattdeutsch. Vom Klönen und Schnacken. Dudenverlag : Berlin 2022, 127 S. ISBN 978-3-411-75676-6... Weiterlesen...Johrbook 2022 ut NRW11. März 2022Dat is nu al dat föffte plattdüütsche “Joahrbauk”, dat de “Verein zur Förderung der plattdeutschen Sprache im Mühlenkreis Minden-Lübbecke” rutbröcht hett. En Reeg Gedichten un Vertellen sünd op de 11 Regionen opdeelt, de den Kreis utmaken doot. Een süht aver ok, wat opstunns löppt: in 6 Berichten to “Plattdüütsk hört in Linnermund”. Un an’t Enn: “Plattdütsk in de Kerken”. Wegen Corona hett de Redakschoon dat Johrbook “in ’n stillem Kämmerlein tohoopeschaustert”. Man dat Tosamenspeel vun Sachtext un Literatur passt allerbest. Jüst de Berichten ut Kinnergoorns un Grundscholen oder ok vun de “Tohoope-Arbeit twüsken Offene Ganztagsschule (OGS) un Ohlenhülpe-Inrichtung” köönt as gode Bispelen dörgahn. So’n Barg Platt in NRW – dor kannst di över wunnern. Un dor kannst di to freien. Platt in unsen Müählnkreis Minden-Lübbecke. Joahrbauk 2022. Hrsg.: Verein zur Förderung der plattdeutschen Sprache im Mühlenkreis Minden-Lübbecke. 2021, 91 S. ISBN 978-3-00-069955-9... Weiterlesen...Lümborg: För wat sik dat Besinnen lohnt4. März 2022Rolf Kliemann vertellt eenmal rundüm Lümborg. He kennt de Steden, an de so vele lütte un grote Beleevnisse hangen doot, he kennt de Minschen, de jümehr egen Gesicht hebbt, un he kennt de Daag, de en Dreihpunkt weren för de Region. Un so weet he wat to vertellen vun den Kraan, den Kalkbarg oder den Watertoorn. Oder vun König Ernst August, de in Hannover seet un partu nix vun de Iesenbahn weten wull: “Ik will nich, dat jeder Schooster un Snieder so flink reisen kann as ik!” Dat is knapp 50 Johr her, dor hett Dieter Bellmann verlangt, op Platt schullen mehr Sachböker schreven warrn. De regionale Achtergrund fangt bi de Namen an. Rolf Kliemann verkloort kort, woneem se herkaamt: Eenhof, Hasenborg oder de Itze. In sien Gegend kennt he sik allerbest ut, un he finnt de passlichen Wöör, Miniaturen to vertellen. In sien Breef to dat Book schrifft Rolf Kliemann: “Mi sünd in mien Öller (97) noch en poor Geschichten infullen, de ik to’n Johrsenn heff drucken laten.” Rolf Kliemann: Heff ik dat al vertellt? Geschichte un Geschichten in un um Lümborg. Almáriom : Bardowick 2021, 104 S. ISBN 978-3-945264-10-2... Weiterlesen...De Welt mit Oterndörper Ogen23. Februar 2022Elsa Rennert, Uwe Hülsen un John Schriever höört to de “Plattsnackers ut Oterndörp” to. 2015 hebbt de anfungen mit Plattsnacker-Avende. De een oder anner hett wat vörleest oder vertellt. Un denn hebbt welk anfungen, jümmehr egen Geschichten optoschrieven. Nu is dor en Book vun worrn, indeelt in negen Stremels vun “Kinnertieden” över “Op Arbeit” bet hen na “Verdreiht un doch wohr: Uns Leven vundaag”. Jeedeen vun de Schieverslüüd hett sien (oder ehr) egen Sicht op de Welt: Elsa Rennert hett nipp un nau henkeken un tohöört – se vertellt fründlich un denkt över de Welt na. John Schriever geiht direkter op de Saken daal, man af un an speelt dor ok en Happen Phantasie mit rin. Uwe Hülsen hett meisttiets een in’n Sinn, un an’t Enn kannst vun Harten lachen. Dat is de Mischung, de düt Book to’n Leesvergnögen maakt. Dre Oterndörper Plattsnackers vertellt. Elsa Rennert, Uwe Hülsen un John Schriever. Im Auftrag des Heimatbundes der Männer vom Morgenstern hrsg. von Heiko Völker. Illustrationen von Jörg Tegeler. Männer vom Morgenstern 2021, 132 S. ISBN 978-3-931771-01-0... Weiterlesen...Wat för Leckersnuten14. Februar 2022Plattdüütsche Kaakrezepten gifft dat en ganze Reeg – man wat Christa Schroeder hier tohoopstellt hett, dat is mehr. De Opboo is kloor: 32 Rezepten, indeelt in 14 mal ”Wat to’n Äten”, un 18 mal “Wat to’n Snökern”. Jeedeen Gericht hett in dat Ringbook en Dubbelsiet, so kann een dat bi den Heerd ok goot opslaan. Op de linke Siet steiht baven “Wat dor allens tohöört” un dor ünner “So warrt dat mookt”. Dorto gifft dat bunte Fotos, de een dat Water ünner de Tung tosamenlopen laat. Christa Schroeder höört meist 40 Johr en plattdüütschen Schrieverkring to, un dat se Theaterspelen kunn, dorför hett se en Laienspeelkring op de Been stell. Wat ehr afsünnerlich wichtig is: As Lektorin hett se en ganze Reeg plattdeüütsche Gottesdeeensten fiert Dat Platt is so opschreven, as de Lüüd dat in Deefholt snackt. Christa Schroeder seggt sülvst: “Un dit lüttke Book hier, dat höört to dat Beste to, wat mi passeern kunn!” Christa Schroeder: Loot jo dat schmecken! Ein plattdeutsches Kochbuch mit Rezepten zum Schmunzeln. Schröderscher Buchverlag : Diepholz 2021, 79 S. ISBN 978-3-89728-088-1... Weiterlesen...Fritz Reuter siene Vöröllern7. Februar 2022Wat weet wi vun de Minschen ut Fritz Reuter sien Familie? Vun sien Vadder un sien Mudder hett woll jeedeen mal wat leest, vör allen ok vun de Breven her, de twüschen den jungen Fritz un sien Vadder hen un her lopen sünd. Düt Familienbook kriggt nu mehr as 1300 Minschen in 9 Generatschonen faat, de to de Familie mit tohören doot oder de dor op anner Oort mit rinspeelt, to’n Bispeel as Paten. Dat Book wiest, wat een allens an Daten in en Familiengeschicht tohoopstellen kann, de vun de Technik un den Opbo her modern is: Namen, Daag, Profeschoon – un ok de Rull oder de Naam, wenn Reuter vun düssen Minschen schrieven deit. Un denn: Wat hebbt de Lüüd in’t 17. oder 18. Johrhunnert arbeidt? Sünd se wiet vun to Huus wegkamen? Un: Wo vele sünd in’t 19. Johrhunnert na Amerika utwannert? Ok wenn dat mit Reuter sien Literatur nich veel to doon hett: Dat Book is en gewaltigen Överblick över en Familie dör en Reeg Johrhunnerte. Hans-Georg Kunisch: Fritz Reuters Genealogie. Ein Familienbuch über Herkunft und verwandtschaftliche Beziehungen des Heinrich Ludwig Christian Friederich Reuter. Hrsg. v. Fritz-Reuter-Literaturmuseum Stavenhagen. kikut-Sonderheft. Stavenhagen 2021, 200 S. ISBN 978-3-910030-19-X... Weiterlesen...30 Johr – woneem is de Grenz afleven?1. Februar 2022Dörtig Johr is dat her, dat sik de Grenz twüschen Oost- un Westdüütschland oplööst hett. In 22 Geschichten vertellt Susanne Bliemel dorvun, woneem de Grenz afbleven is – mal dicht bi dat würkliche Leven, mal en Spier wieder dor vun af. In de Köpp jedenfalls sünd vele Grenzen noch dor, oder beter: sünd vele Ünnerschede noch dor. Un dor weiht ok geern mal en VEB- oder en Marktwirtschafts-Wind dör de Vertellen. Susanne Bliemel vertellt frisch rut. Se kennt ehr Lüüd un hett jüm nipp un nau ankeken. Un se vertellt vun jüm as Reuter dat daan hett: sinnig, plietsch un poetisch. As wenn se to de Familie mit tohören deit, as wenn se dor mit bi ween is un as wenn se mi dat jüst sülvst Oog in Oog vertellen deit. Man se seggt nich: Dat is goot lopen un dat nich so. Nee, bi ehr hebbt de Lesers dat Recht, dat för sik sülvst ruttofinnen. To’n Glück gifft dat ja kene unpolitischen Geschichten. Ok op Platt nich. Susanne Bliemel: Bananen vör de Sœgen … Plattdeutsche Geschichten aus Norddeutschland. Rostock : Hinstorff 2020, 111 S. ISBN 978-3-356-02326-8... Weiterlesen...Gedichten ut Golnste28. Januar 2022Riemels, lütte Gedichten, de vun den Alldag berichten doot, vun de eenfachen Minschen un jümehr Arbeiden un Doon, vun jümehr Denken un Wünschen. Wat is güstern noch ween un woneem geiht dat hen in de Welt? Allens inpackt in lütte Versen: “Nao Stoppelmarkt, daor will ick henn, un will daor düchtig fier’n, will aal’s bekieken, alles seih’n, un kopen wat ick mag lier’n.” Franziska Meyer hett as Sniedersch in Golnste, dat liggt twüschen Vechte un Twustern, leevt. Se harrr teihn Kinner. Ehr Leven lang hett se Leder, Gedichten un Geschichten schreven, dat een oder anner Stück is ok al mal in en Zeitung oder Book afdruckt worrn. Söven Johr nadem dat Franziska Meyer dootbleven is, hett ehr Dochter dat lütte Heft tohoopstellt un dor hunnert Stück vun drucken laten. Ok dat is en Oort, trüchtokieken un Dank to seggen. Dor kann jeedeen wat vun mitnehmen. Un wenn dat man blots de Indruck is vun de plattdüütsche Spraak in’t Ollenborger Mönsterland. Wer kennt noch’n Poggen. Plattdütsche Gedichte. Franziska Angela Meyer, geborene Dierken. Rutgäben von Maria Franziska Meyer. Selbstverlag 2021, 28 S.... Weiterlesen...Holmes in’t Moor24. Januar 2022Sherlock Holmes siene Kriminalgeschichten speelt normaal in London. Dat in England aver noch mehr Gegenden goot sünd för Moord un Dootslag, man ok för dat Gräsen un Grugen, weet jeedeen, de al mal in’t Dartmoor ünnerwegens ween is. Arthur Conan Doyle hett “The Hound of the Baskervilles” kort na 1900 opschreven. Nu is de Geschicht op Platt rutkamen, översett vun Rainer Kramer. Rainer Kramer hett sik sülvst de Opgaav geven, Klassikers ut de Weltliteratur op Platt to översetten un ruttogeven. Bet nu sünd rutkamen: Melvilles „Bartleby“, Voltaire sien „Candide“ un „Pionocchio“ vun Collodi. Un wenn Kramer dat Geld för den Druck opbringt, denn schüllt woll noch söven Böker mehr rutkamen: Stevenson, Conrad, Wells…. Kramer hett sien egen Schrievwies entwickelt, de aver teemlich dicht bi Saß is. Af un an markt een, dat he bi’t Översetten to dicht bi de Wöörböker blifft: “He kööm doch för wennt ’s Moorns eerst teemlich laat up” – achter düt “för wennt” stickt nix anners as “für gewöhnlich”. Man dat lett doch eher ungewöhnlich. Sir Arthur Conan Doyle: De hünen Hund von dat Huus Baskerville. Sherlock Holmes sien verdüvelt swaarsten Fall. Nedderdüütsch von Rainer Kramer. Selbstverlag (kauwesrainer@yahoo.com). Berlin 2022, 343 S. ISBN: 978-3-00-068398-5... Weiterlesen...So geiht Heimatbook8. Januar 2022Dat Johrbook vun den Heimatbund Oldenburger Münsterland 2022 kann as Vörbild dörgahn: Vun den Opboo, de Gestaltung un de passlichen Biller her. Vun de Themen her, de all fast in de Landschaft staht, wat dat nu ut uns Tiet is oder historisch. Vun de Schrieverslüüd her, de sik utkennen doot un dat ok wiest. Vun de Redakschoon her, de för korte Artikel mit veel Inhalt to ganz ünnerscheedliche Themen sorgt hett. Hier wiest sik, wo överall “Heimat” binnensteken deit – ok in den wunnerboren Bericht över de Fro, de dat Biontech-Impfmiddel mit entwickelt hett: Dr. Özlem Türeci, de 1967 in’t Ollenborger Mönsterland op de Welt kamen is. Platt gifft dat in Geschichten un Gedichten. Heinrich Siefer schrifft över dat Grootwarrn mit mehrere Spraken, he stellt en Lehrbook vör, un he fraagt Doreen Brandt ut, siet 2020 Junior-Perfessersch för Plattdüütsch an de Uni Ollenborg. Un ok de ne’e Beopdragte för Saterfreesch, Henk Wolf, warrt vörstellt. Veel kann een dor nich beter an maken. Woso aver döcht Platt nich för mehr as de plattdüütsche Eck? Woso gifft dat nich ok mal en “normalen” Artikel op Platt, över Kulturgeschicht oder Politik fröher? Platt is mehr as blots en Afteken, so as dat dree vun de Böker insett, de hier vörstellt warrt: “Dei Pestschinken is bolle so olt as use Stadt”, “Laon – Lohne” un “Döllen dör de Johre”. Oldenburger Münsterland. Jahrbuch 2022 (71. Jahrgang). Hrsg. v. Heimatbund für das Oldenburger Münsterland. ISBN: 978-3-941073-33-3... Weiterlesen...Prinz op Mäkelbörgsch3. Januar 2022So’n Stück Weltliteratur as “Le petit prince” vun Antoine de Saint-Exupéry döcht för jede Spraak. Dat hett al de Version vun Arnd Immo Richter (Bernd Diebner) wiest, un dat wiest nu ok de fröhere Paster Christian Voß mit sien Stück in Mäkelbörger Platt. He finnt en Vertell-Spraak, mit de junge Lüüd wiss wat anfangen köönt – ok wenn he af un an teemlich dicht bi de hoochdüütsche Vörlaag blifft. Ulrich Bossier hett översett: „Ach, kleiner Prinz, erst so nach und nach habe ich verstanden, wie melancholisch dein kleines Leben einst gewesen ist.“ Man Hans Magnus Enzensberger hett dorvun maakt: „Nach und nach, kleiner Prinz, habe ich kapiert, was dich in deinem jungen Leben so bekümmert.“ Un bi Voß heet dat nu: „Ach, mien lütten Prinz! So pö a pö heff ick dien lüttet Läben verstahn, dat diene Seel dor swor an tau drägen hett.“ De „lütte Prinz“ is siet 2014 to’n Geld-Druck-Maschien worrn. To de Tiet sünd de Rechten an den Text free worrn – nu sünd al mehr as 300 Spraak-Versionen op den Markt. De Edition Tintenfaß is mit knapp 150 mit dorbi. So oder so: En Book to’n Lesen – un vör allen ok to’n Vörlesen. Antoine de Saint-Exupéry: De lütte Prinz, Mit de Biller von den’, wecker dat Bauk schräben hett. In mäkelbörgsch Platt oewersett’t von: Christian Voß. Edition Tintenfaß : Neckarsteinach. 2. Oplaag 2021. ISBN: 978-3-947994-65-6... Weiterlesen...Mit Bibelversen dör dat Johr27. Dezember 2021De Heer is mien Hirt, mix fehlt mi – dat sünd de Wöör för den Januar-Maand. Se sünd op dat Klennerblatt op, dorto gifft dat en Bild vun den Bokeler See. Un ünnen sünd de Daag un de Wekendaag to sehn. Mit de Natur un Gott sien Woort geiht dat so dör dat Johr. De Stücken hebbt Lüüd översett, de ut dat westliche Neddersassen kaamt: ut Westoverledingen, dat Rheiderland, Papenborg un Heede. Un ut düsse Gegenden is denn ok dat Platt. De Lüüd hebbbt tohooparbeidt – över de Grenzen vun Karkspeel un Glovensrichtung rut. De lütte Klenner kann an jeedeen Wand hangen. He is 15 x 21 cm groot. 2022 Kalenner up Platt. Mit Bibelversen und Fotos aus der Region Emsland und Ostfriesland. Gestaltung / Projektleitung: Birgit Spielvogel. Kontakt: Plattdüütsch in de Kark, Loccum.... Weiterlesen...Nedderdüütsche Wetenschap: Veel Middelöller13. Dezember 2021Dat is nu al de 144. Johrgang vun dat “nedderdüütsche Johrbook”. Johr för Johr kann een so nalesen, för wat sik de nedderdüütsche Philologie opstunns afsünnerlich interesseren deit, to wat forscht warrt (un to wat nich). Düütlich bavenan steiht ok düt Johr de Spraakgeschicht, vun dat ole Sassisch bet hen na Middelnedderdüütsch. In de Nu-Tiet kickt Melvin Pötzsch, de ut sien Bachelerarbeit den Artikel “Sprachtod- und kontaktinduzierte Prozesse im westfälischen Ortsdialekt Lutterbergs” (S. 55-78) maakt hett. Lutterberg liggt in’t süüdliche Neddersassen, hier warrt Platt weniger, un wat een dor to hören kriggt, passt sik mehr un mehr an den hoochdüütschen Standard an. Ünner’n Streek steiht: “Neben der Diskussion komplexer kontaktinduzierter Phänomene in asymmetrisch ausgerichteten Dominanzverhältnissen, welche über typische Erscheinunen wie Entlehnung hinaus gehen, sollte eine Validierung einiger durch die Daten gegebener neu aufgestellter Prozesse erreicht werden.” Jahrbuch des Vereins für niederdeutsche Sprachforschung. Jg. 2021 (144). Wachholtz : Kiel / Hamburg 2921, 167 S. ISSN 0083-5617 ISBN 978-3-529-0424-7... Weiterlesen...Störtebeker, Ahab un anner Spökenkraam3. Dezember 2021De Tüdelband is mit plattdüütsche Musik för junge Lüüd nu al över teihn Johr lang fix in Gang. Mit düt Höörspeel-Projekt hebbt se wat utprobeert, hebbt se wat waagt. Denn hier nimmt de Musik Stimmungen op vun dat, wat sik in dat Höörspeel entwickeln deit (CDs 1 un 2). Un hier wiest de Tüdelband, dat se Profis sünd un mit jümehr Warktüüch ümgahn köönt. Op de drüdde CD sünd noch mal all de Musikstücken op. Dat is wat to’n Henhören – twischen Kümmel un Korn singst du vun Pest un Kap Horn. Hamborg versteiht sik as de Middelpunkt vun allens, wat na de solten See smecken deit. Un dor mengeleert sik denn wat tohoop twüschen Aal-Uwe, Taxifohrer Carl Gustav, Störtebeker un den witten Waalfisch. Un keeneen weet, wat de Neoliberal-Kapitalist nich ok blots to den mystischen Klimbim tohöört as en Handvull vun de annern ok – is nich jümmers licht to, mit de Story mittokamen. Mit de Platt-Utspraak haakt dat hier un dor in dat Höörspeel. Man bi Liekedelers kann een ja nie so recht weten, woneem de herkaamt. Man dat Klaun, klau, Äppel wüllt wi klaun nu heel un deel op Platt ankümmt un mit denn se mutt ut Hamborg sien to Enn geiht, dat verwunnert denn doch. Un wokeen Wöör as teelt dor rinsmuggelt un Stücken vun de Grammatik ut dat nördliche Schleswig-Holsteen mitbröcht hett (as in: du büst dör all Straten fohrn), mütt ok keeneen nipp un nau to weten kriegen. Die Tüdelband: Ahab. Höörspeel vun G.A. Beckmann mit Musik vun de Tüdelband. Hamburg 2020, 3 CDs. LC 52581... Weiterlesen...Dat Leven, de Welt un Dibaba mittenmang22. November 2021De Welt is vigeliensch worrn, snaaksch un verdreiht. Dat een dor liekers sien Kurs dör dat Leven vun vundaag finnen kann, dat wiest de 43 Geschichten, de hier afdruckt sünd. Nee sünd se nich, denn in de Böker “Platt is mien Welt”, “Mien Welt blifft Platt”, “Moin tosomen” und “Ünnerwegens” sünd se al mal binnen ween. Un jümmers geiht dat üm Minschen – üm de Naverslüüd jüst so as de Plattsnackers jichenswo op de Welt. Yared Dibaba hett dat Plattdüütsche en nee Gesicht geven. As Moderator, as Entertainer, as Muskant. Un as Geschichtenverteller. Wat he to vertellen hett, is nich ooltbacksch – ok wenn dat egaalweg üm Heimat geiht. Denn dat söökt de Minschen överall: Dat se sik goot föhlt, dat se sik utkennt, dat se mitsnacken wüllt. Kümmt egentlich mal een vörbi, de Yared Dibaba en Handvull Kommas in siene Stücken rinschrifft? Un ok bi de Schrievwies kunn een hier oder dor wat nahelpen. Yared Dibabas Allerbest. Quickborn-Verlag : Hamburg 2021, 118 S. ISBN: 987-3-87651-480-2... Weiterlesen...Brüchert siene Identitäten3. November 2021Woneem bün ik to Huus, wat is “mien” Spraak, wat hett mi to dat maakt, wat ik bün? Düsse Fragen nimmt Erhard Brüchert in sien Book op un verarbeidt jüm to 26 persönliche Berichten to de groten Themen “Platt: Spraak un Heimat”, “Geschicht: Ollenborg un Oostfreesland” un “Minschen: Ollenborger un Oostfresen”. Erhard Brüchert is düt Johr 80 worrn. Schoolmester för Düütsch un Geschichtsünnerricht is he ween, un düsse Kurs hett sien Schrieven vun Vertellen, Höörspelen un Theaterstücken jüst so den Dreih geven as bi düt Book. Dor gifft dat veel to entdecken, so in de Stücken över “Plattdüütsch in dat 21. Johrhunnert” oder över dat Plattdüütsche Volkstheater in Ollenborg. Gifft aver ok Saken, dor schull man mal nafragen: Weer August Hinrichs en “verführter Heimatdichter”? Un wenn dat um de Spraken-Charta geiht, denn is “EU-Charta” eenfach verkehrt – denn de Charta is opsett worrn vun den Europa-Raat. Erhard Brüchert: Ort – Sprache – Heimat. Essays zur Geschichte und Sprache Oldenburgs und Ostfriesalnds. Isensee : Oldenburg 2021, 190 S. ISBN: 987-3-7308-1761-2... Weiterlesen...
